Jornalet es un jornal en linha d’accès gratuit. Es sonque aquò mas a l’encòp es tanben fòrça mai de causas: es un jornal occitan, escrich en occitan, pensat d’un biais occitan e destinat als occitans. Dich d’una autra faiçon, podèm explicar tanben çò qu’es pas lo Jornalet: es pas un jornal d’un partit, es pas sectari, non a pas cap de tòca politica ni a cap de dobla intencion.
Al nivèl lingüistic, es un jornal escrich exclusivament en occitan, dins tota sa varietat dialectala mas en respectant la grafia classica. Aqueste jornal a tres règlas estrategicas: informar, èsser un ponch neuralgic de totas las opinions del país e èsser un nautavotz per las opinions dels legeires.
Lo primièr ponch, aquel d’informar, se satisfà amb de nòvas e d’entrevistas que se publican cada jorn. La tòca d’un jornal occitan e en occitan es que los occitans se pòscan informar de las nòvas d’Occitània, de la meteissa faiçon qu’un suedés legís un jornal suedés escrich en suedés per s’informar de çò que se passa en Suècia. La tòca de Jornalet es sonque d’informar.
Dins l’apartat d’opinion, Jornalet a tres braces. Per un costat, l’opinion del jornal es marcada dins l’editorial, mes a jorn cada dimenge. Ailà òm i pòt legir las opinions de la còla del Jornalet per rapòrt als divèrses aspèctes de la vida politica, culturala, economica, sociala o environamentala del país. A mai, una seguida d’opinaires publican cada jorn d’articles d’opinion exclusius pel Jornalet.
Fin finala, dins lo Jornalet i poiretz trobar los principals blogaires occitans meses a jorn a la minuta. Cal escotar çò que pensa e çò que ditz lo malhum dels blògs, perque son lo pols del país.
Al delà de las informacions e de las opinions, l’importància essenciala de Jornalet son los legeires. Per lor balhar la paraula, lo sit a qualques mecanismes de participacion. Per un costat a lo sondatge de la setmana. A mai, òm pòt escriure sos comentaris dins totes los articles del jornal.
Tanben se publica de galariás de fòtos e cada setmana se fa conéisser un grop o pagina de Facebook.